Խորհուրդներ

Շատ մարդկանց համար նոր աշխատանքի դիմելու գործընթացը կարող է լարվածություն և վախ  առաջացնել: Կան աշխատանք փնտրելու բազում ուղիներ և տարբերակներ, պարզապես պետք է իմանալ` որտեղ և ինչպես փնտրել: Ստորև ներկայացված են մի քանի խորհուրդներ, որոնց հետևելով` Դուք կարող եք գտնել Ձեր երազած աշխատանքը:

1. Հստակ որոշեք, թե ինչ աշխատանք եք ուզում: Ինչ աշխատաժամեր, պարտականություններ և աշխտավարձ եք ակնկալում, ինչ աշխատանքային միջավայրում կցանկանաք աշխատել:
2. Կազմեք կամ թարմացրեք Ձեր ռեզյումեն: Չափազանց կարևոր է, որ Ձեր յուրաքանչյուր դիմում համապատասխանի այն աշխատատեղին, որին դիմում եք: Ուստի կազմեք Ձեր ռեզյումեն հայտի պահանջների համաձայն:
3. Գրանցվեք մի քանի կադրային գործակալություններում: Դուք վճարում եք նրանց, որպեսզի նրանք օգնեն Ձեզ գտնել  Ձեր ցանկալի աշխատանքը: Համոզված եղեք, որ համագործակցելը կադրային գործակալությունների հետ հարմար է Ձեզ համար, և, որ պայմանագրում չկան բացառիկ կետեր, որոնք կսահմանափակեն Ձեր հնարավորությունները այլ գործակալություններից օգտվելու համար:
4. Գրանցվեք օնլայն ռեժիմով աշխատանք որոնելու կայքերում: Օրական հարյուրավոր աշխատատեղեր են գովազդվում նմանատիպ կայքերում: Գրանցվեք այդ կայքերի համապատասխան բաժնում և ամեն օր Ձեր էլ-փոստով ստացեք թարմ հայտարարություններ այն րնկերությունների և կազմակերպությունների թափուր աշխատատեղերի վերաբերյալ, որտեղ նախընտրում եք աշխատել:
5. Փնտրեք աշխատանք թերթերում: Շատ կազմակերպություններ նախընտրում են իրենց հայտարարությունները տեղադրել թերթերթում:
6. Ընտանիքի անդամներին և ընկերներին տեղեկացրեք, որ Դուք աշխատանք եք փնտրում: Այլ թեկնածուների համեմատ Դուք կունենաք առավելություն, եթե որևէ մեկը երաշխավորի Ձեզ տվյալ թափուր պաշտոնի համար:
7. Դիմեք աշխատանքի: Վերոնշյալ բոլոր քայլերը կօգնեն Ձեզ բազում թափուր աշխատատեղերի մասին տեղեկություններ ունենալ և ընտրություն կատարել: Ընտրեք այն պաշտոնը, որը կարծում եք կբավարարի առաջին քայլում նկարագրված Ձեր պահանջները, համապատասխանեցրեք Ձեր ռեզյումեն պաշտոնի նկարագրին և ուղարկեք դիմում-հայտը:

Ուշադիր եղեք, սթափ գնահատեք` արդյոք Ձեր գիտելիքները համապատասխանում են բոլոր պահանջներին: Մի դիմեք աշխատանքի միայն այն պատճառով, որ բարձր աշխատավարձ է ակնկալվում: Դուք կվատնեք և Ձեր, և տվյալ կազմակերպության ժամանակը:

Տեքստը թարգմանված և խմբագրված է հետևյալ աղբյուրից http://www.howtodothings.com/careers/how-to-apply-for-a-new-job:

Մասնագիտական ռեզյումե գրելն աշխատանք փնտրելուն ուղղված առաջին քայլն է: Գոյություն ունեն բազմաթիվ ծառայություններ, որոնք կարող են օգնել Ձեզ այս հարցում, բայց մի շտապեք գումար ծախսել ռեզյումե ձեռք բերելու նպատակով, այլ փորձեք այն ինքնուրույն գրել: Առավել ևս, որ համակարգիչների կիրառման լայն տարածման այս դարում այս առաջադրանքն այլևս այդքան դժվար չէ, որքան առաջ էր թվում: Ռեզյումեն Ձեր մարկետինգային զենքն է, Ձեր կոմերցիոն գրքույկը, ուստի ոչ ոք Ձեզանից լավ չի կարող այն կազմել: Գոյություն ունի ռեզյումեի 2 հիմնական տեսակ, որոնք տարբերվում են ըստ իրենց կառուցվածքի:

Ժամանակագրական ռեզյումե

Այս տիպի ռեզյումեն Ձեր աշխատանքային ժամանակացույցն է` շարադրված հետընթաց կարգով` վերջին աշխատանքից մինչև առաջինը:

1. Կարող եք սկսել Ձեր ռեզյումեն` նշելով նրա նպատակը: Այն ցույց է տալիս Ձեր հետաքրքրությունների շրջանակը և կարող է իր մեջ ներառել Ձեր ձգտումները: Օրինակ` Ձեր նպատակն է պաշտոն զբաղեցնել զարգացող կազմակերպության սննդի ծառայության ղեկավարման բաժնում` աշխատանքային առաջընթացի հնարավորությամբ:
2. Եթե Ձեր կրթությունը համապատասխանում է առաջարկվող աշխատանքի պահանջներին, հետևելով ռեզյումեի նպատակին, ներառեք այն «Կրթություն» վերնագրի ներքո: Անհրաժեշտության դեպքում նշեք տեղեկություններ ավագ դպրոցում և բուհերում ստացած Ձեր կրթության մասին: Պետք չէ նշել միջնակարգ դպրոցը: Նշեք ուսումնական հաստատությունը, քաղաքը, մարզը/երկիրը և կրթության աստիճանը կամ վկայականը: Պատվոգրերի առկայության դեպքում հիշատակեք դրանք, եթե կարծում եք, որ դրանք կբարձրացնեն աշխատանքի ընդունվելու Ձեր հնարավորությունները:
3. Թվարկեք Ձեր նախկին աշխատանքները` վերջինից դեպի առաջինը կարգով: Նշեք աշխատանքի ընդունման և աշխատանքից ազատվելու ամսաթվերը, օրինակ` 2001թ մարտից- 2005թ հունվար, Ձեր զբաղեցրած պաշտոնը, քաղաքը և մարզը/երկիրը: Այս տվյալները տեղադրեք «Աշխատանքային փորձ» վերնագրի ներքո:
4. Յուրաքանչյուր աշխատանքային փորձ նշելիս կետ առ կետ թվարկեք կատարած առաջադրանքները, նախագծերը, ձեռքբերումները, նպատակները և պարգևատրումները: Ձեր կողմից կատարված աշխատանքները նկարագրելիս օգտագործեք Ձեր գործողություններն առավելագույնս ճիշտ արտահայտող բայեր, ինչպես օրինակ` վերահսկել, ներգործել, կազմակերպել, վաճառել, մշակել և այլն: Հնարավորության սահմաններում արտահայտեք նաև չափելի արդյունքները, օրինակ` «վաճառքները խթանող ծրագրի կիրառման արդյունքում նկատվել է եկամտի 7% աճ» կամ «հաճախորդների սպասարկման բարելավման դասընթացները, որոնք առաջարկվել են գործընկերներին, հանգեցրել են հաճախորդների գոհունակության ցուցանիշների բարձրացմանը»:
5. Ներկայացնելով Ձեր` նախկինում կատարված աշխատանքները` նշեք, եթե ունեք, տվյալ աշխատանքի հետ առնչվող լիցենզիա կամ վկայագիր, օրինակ` էլեկտրիկի լիցենզիա կամ համակարգչային ցանցային մասնագետի վկայագիր: Վերոնշյալ տվյալներն ամփոփեք «Լիցենզիաներ/Վկայագրեր» վերնագրի ներքո:
6. Եզրափակեք ռեզյումեն «Հարկ եղած դեպքում կարող են ներկայացվել համապատասխան բնութագրեր» նախադասությամբ:

Ֆունկցիոնալ (հմտությունների վրա հիմնված) ռեզյումե

Այս տիպի ռեզյումեն առավելագույս կարևորում է հմտությունները և պակաս կենտրոնանում աշխատանքային փորձի վրա: Այն հատկապես հարմար է ուսանողների, աշխատանքի վերադարձող տնային տնտեսուհիների, նախկին դատապարտվածների և սահմանափակ փորձ ունեցող անձանց համար, սակայն յուրաքանչյուր անձ կարող է օգտագործել այն:

1. Սկսեք ռեզյումեն` նշելով նպատակը:
2. Շարունակեք` նշելով կրթությունը:
3. Ձեր նախկին աշխատատեղերը թվարկելու փոխարեն կետ առ կետ կազմեք Ձեր հմտությունների և հնարավորությունների ցուցակը: Առաջնորդվեք ժամանակագրական ռեզյումեի չորրորդ կետով, այն է` նկարագրել կատարած գործողությունները և ձգտել արտահայտել դրանք չափելի արդյունքներով: Մի' ընդգրկեք նախկին գործատուներին, փոխարենը նշեք Ձեր հմտությունները և իրականացրած առաջադրանքները: Ներկայացրեք այս տեղեկությունները «Աշխատանքային հմտություններ» վերնագրի ներքո:
4. Թվարկեք Ձեր բոլոր աշխատավայրերը` առանց ամսաթվերի: Պարզապես նշեք գործատուին, քաղաքը, մարզը/երկիրը և Ձեր զբաղեցրած պաշտոնը: Այս տվյալներն ընդգրկեք «Աշխատանքային փորձ» վերնագրի ներքո:
5. Ավարտեք այնպես, ինչպես նշված է ժամանակագրական ռեզյումեի նմուշում:

Մի մոռացեք, որ այս նմուշները ընդամենը ուղեցույց են: Օգտագործեք Ձեր հնարավորությունները ռեզյումեն սեփական ոճով ձևավորելու համար և փորձեք առավելագույնս արտահայտել այն Ձեր անձնական ոճով:

Տեքստը թարգմանված և խմբագրված է հետևյալ աղբյուրից http://www.howtodothings.com/careers/a1998-how-to-write-a-resume.html:

Curriculum Vitae բառացիորեն թարգմանաբար նշանակում է <<Քո կյանքի պատմությունը>>: Ձեր CV-ն շատ կարևոր փաստաթուղթ է: Դրա հետ են կապված Ձեր հույսերը և երազանքները ապագայի վերաբերյալ, կարիերայի աստիճաններով դեպի վեր Ձեր հաջորդ քայլը, ավելի լավ պաշտոնը, ավելի շատ փողը, նոր մարտահրավերները և այլն: Այդ պատճառով, եթե Դուք չեք ցանկանում կորցնել Ձեր կողմից այդքան շատ “ցանկալի հնարավորությունը”, ապա Ձեր CV-ն պետք է լինի որքան հնարավոր է տպավորիչ: Հակիրճ և ճիշտ CV գրելը պահանջում է համապատասխան փորձառություն և գիտելիքներ: Շատ փայլուն մասնագետներ չեն կարողացել մասնագիտական բնագավառում հասնել հաջողությունների միայն այն պատճառով, որ նրանց չի հաջողվել պատշաճ կերպով ներկայացնել իրենց տաղանդները, հմտությունները, գիտելիքները և փորձառությունը:

Եկեք այստեղ դիտարկենք ընտրման հոգեբանությունը: Գործատուն մարդ արարած է, ով, ինչպես բոլոր մարդիկ, ղեկավարվում է զգացմունքներով: Այսօր հիմնավոր է համարվում այն փաստը, որ ցանկացած բնագավառում մարդկանց որոշումները ավելի շատ զգացմունքային են, քան բանական: Փորձը ցույց է տալիս, որ մարդկանց որոշումների կայացման մեջ զքացմունքներ, թե բանականություն հակադրության ցուցանիշը կազմում է մոտավորապես 70/30 հարաբերությունը: Պրոֆեսոր Դանիել Կահնմանը և իր թիմի` Նոբելյան մրցանակի արժանացած աշխատությունը հստակորեն ներկայացնում են, որ մենք գործում ենք ոչ թե բանական, այլ “զգացմունքային” մակարդակի վրա: Թե սպառողի վարվելակերպը, թե աշխատակիցների վերաբերմունքը և թե մարդկային լավ հարաբերությունները ղեկավարվում են զգացմունքներով: Մարդկային վարվելակերպն ուսումնասիրող գիտությունը մարդկային որոշումների կայացման գործընթացների բացահայտման մեջ զգալիորեն առաջ է անցել բոլոր նեոկլասիկ տեսություններից: Նույնը վերաբերվում է նաև CV կազմելուն: Դուք պետք է սովորեք կապ հաստատել միայն հեռանկարային գործատուների հետ: Իսկ կարևորն այն է, որ Դուք կցանկանաք, որ նրանք կիսեն Ձեզ հետ իրենց փորձառությունն այն ասպարեզում, որտեղ Դուք փայլում եք և ունեք բավական հմտություններ: Ընտրության գործընթացը կարող է համարվել ինչպես արվեստ, այնպես էլ գիտություն: Մարդկային նախապաշարմունքների գործոնը երբեք լիովին չի վերանա: Բայց միշտ չէ, որ դա կարող է վատ նորություն համարվել: Դա իրականում կարող է հիանալի հնարավորություն լինել Ձեզ համար, եթե Դուք կարողանաք խելացի կերպով օգտագործել այս հանգամանքը:

Թող որ այդ գործոնները աշխատեն Ձեզ համար և ոչ թե Ձեր դեմ: Ահա թե որտեղ պատշաճ կերպով կազմված ռեզյումեն կարող է օգնել Ձեզ: Ինչու՞ տպավորիչ ռեզյումե: Տպավորիչ ռեզյումե կազմելը հավասարազոր է անձնական իմիջի ձևավորմանը: Դա առաջին խնդիրն է, որը պահանջում է լուրջ և խելացի մոտեցում: Տպավորիչ ռեզյումեի առավելություններից մեկն այն է, որ այն կարող է բարձր մրցակցության առկայության դեպքում ընտրության գործընթացում օգնել Ձեզ առանձնանալ մյուսներից: Lավ կազմված ռեզյումեն մեծացնում է Ձեր հնարավորությունները ստանալ տվյալ աշխատանքը նույնիսկ նախքան հարցազրույցը:

Եվ վերջապես, խելացի կերպով կազմված ռեզյումեն կարող է դրական ազդեցություն գործել Ձեր հարցազրույցի ընթացքի վրա: Շատ կարևոր է, որ Ձեր ռեզյումեի մեջ օգտագործված բառերը ընթերցողի մեջ ցանկություն առաջացնեն հանդիպել Ձեզ հետ և հրավիրել Ձեզ այդքան սպասված հարցազրույցի: Ռեզյումեն նման է ապրանքանիշի հաստատման: Այն Ձեր մասին պատկերացում է ձևավորում այն հանդիսատեսի առջև, որին Դուք եք ընտրել: Այն նաև ճիշտ հանդիսատեսին ճիշտ պատճառներով գրավելու լավագույն միջոցն է: Եթե Դուք բարձր պաշտոն ունեք, ապա Ձեր ռեզյումեն պետք է ավելի տպավորիչ լինի և նույնիսկ հիացմունքի արժանի լինի: Այսպիսով, որո՞նք են այդպիսի տպավորիչ ռեզյումե կազմելու հիմնական քայլերը:

1. Խնդրում ենք ժամանակ տրամադրել` տեղեկություններ հավաքելու այն կազմակերպությունների և պաշտոնների մասին, որոնց համար Դուք դիմում եք: Սա կարելի է համարել ամենակարևոր քայլը, սակայն, որքան էլ զարմանալի թվա, այն նաև ամենաանտեսված քայլն է: Ընկերության ինտերնետային կայքերը և հասարակությանը տրամադրված այլ տեղեկություններ իրենց մեջ պարունակում են որոշ կարևոր ակնարկներ: Դրանք կօգնեն Ձեզ հասկանալ, թե ինչ տեղեկություն պետք է ներառել Ձեր ռեզյումեի մեջ:
2. Կազմեք Ձեր ռեզյումեի մի քանի տարբերակներ, որոնցից յուրաքանչյուրը նախատեսված է համապատասխան արդյունաբերության, կազմակերպության, պաշտոնի համար: Սա անմիջական ազդեցություն է թողնում: Դուք չպետք է կազմեք ընդամենը մեկ ռեզյումե, որը համապատասխան լինի բոլոր աշխատանքների համար:
3. Հավաստիացեք, որ Դուք ընդգծում եք “ճիշտ” տեղեկությունը և չեք կենտրոնանում թերությունների վրա: Ձեր ռեզյումեի առաջին էջը պետք է ներառի Ձեր անձնական տվյալները (կրթության, փորձի առավելությունները և անձնական հատկանիշները) և մասնագիտական խոշոր ձեռքբերումները (այստեղ պետք է ներկայացնեք, թե որքան հիանալի եք համապատասխանում պաշտոնի/կազմակերպության պահանջներին): Հավատացեք, որ հարցազրույց վարողը ավելի լավ կիմանա` ինչ կարող եք անել, քան թե ինչ չեք կարող անել: Այսպիսով, անհրաժեշտ է իմանալ, որ ապրանքանիշի ճանաչվածությունը ոչ միայն լավագույն որակի, գնի գործոն է, այլ նաև սպառողի հետ զգայական կապ հաստատելու ունակություն: Տվյալ համատեքստում Ձեր անձնային ապրանքանիշը պետք է այդ կապը հաստատի հեռանկարային գործատուի հետ:
4. Ուշադիր ուսումնասիրեք աշխատանքի վերաբերյալ հայտարարությունը: Այն սովորաբար պարունակում է որոշակի կարևոր տեղեկություն պաշտոնի, ակնկալվող հմտությունների, գիտելիքների և փորձառության վերաբերյալ: Շատ հայտարարություններ նաև նկարագրում են որոշակի անձնական որակներ, որոնք, ըստ այդ կազմակերպության, կարող են օգնել անձին աշխատանքային միջավայրում հասնել հաջողությունների: Եթե Դուք անտեսեք նրանց կողմից տրամադրված տեղեկությունը, հատկապես այն մասը, որը վերաբերում է անձնային որակներին, և դա չներառեք Ձեր ռեզյումեի մեջ, ապա Դուք կկորցնեք Ձեր այդ հնարավորությունը:
5. Օգտվեք այս հնարավորությունից և առանձնացրեք Ձեզ մյուսներից` այդ տեղեկությունը կիրառելով Ձեզ, Ձեր փորձը և հմտությունները նկարագրելիս: Սա ամենաքիչ ընդգծված քայլն է և պահանջում է որոշակի հմտություններ  և ջանքեր, սակայն կարող է հսկայական օգուտ բերել` ստեղծելով Ձեզ համար կայուն իմիջ:
6. Հստակ և խելացի կերպով բացատրեք Ձեր ուժեղ կողմերը: Դրական, հոգեբանական հիմք ունեցող մոտեցումը Ձեզ առաջարկում է հաջողության ավելի մեծ հնարավորություններ: Ձեր ուժեղ կողմերը գիտակցելը և դրանք հստակորեն ներկայացնելը պահանջում է ջանք և հմտություն, և սա շատ հաճախ, ի վնաս Ձեզ, այն վերջին ճանապարհն է, որ Ձեզ չի հաջողվում անցնել: Եկեք չմոռանանք այն, թե ինչ է ասել Պիտեր Դրաքերը, “Մարդկանց մեծ մասը կարծում է, թե գիտի` որոնք են իր ուժեղ կողմերը, և մեծ մասամբ նրանք սխալվում են”: Սա ինքնագիտակցության և ինքնավերլուծության մակարդակն է, ինչը շատ կարևոր է: Այս քայլը իրագործելու համար Դուք պետք է գրի առնեք Ձեր մտքերը` հաջողությունների նպաստող Ձեր ուժեղ կողմերի վերաբերյալ:
7. Ազատ ժամանակ տրամադրեք և գրի առեք Ձեր հաջողությունները և ուժեղ կողմերը որպես անկախ և ինքնավերլուծական վարժություն: Այնուհետև կարող եք ավելացնել սա անմիջապես անձնային որակները նկարագրելուց հետո: Սա սովորաբար բարդ գործընթաց է, և մարդկանց մեծ մասը չի կարողանում պատշաճ կերպով իրագործել դա: Մի թերագնահատեք կամ գերագնահատեք Ձեր կարողությունները, իրատես եղեք:

Այս ռազմավարությունը շատ ավելի մեծ տպավորություն է գործում, քան, ավելացնելով Ձեր ռեզյումեի էջերի քանակը, բացատրել Ձեր կատարած ամբողջ աշխատանքը և հետո Ձեր ռեզյումեի ինչ-որ հեռավոր անկյունում փորձել բացատրել Ձեր առավելությունները: Շատ ռեզյումեներ զուրկ են հեռանկարային կապակցվածությունից: Ահա թե ինչն է հիանալի ռեզյումեն արժանացնում ուշադրության:

Հաջողության վճռորոշ գործոն է հանդիսանում Ձեր ռեզյումեի` Ձեզ որպես մասնագետ ճիշտ ներկայացնելը: Կարևոր է գիտակցել, որ Ձեր ռեզյումեն օգնում է շատ մարդկանց հասկանալ Ձեր “արժեքավոր առաջարկը”: Այն իրականում հոգեբանազգայական մեծ գործառույթ ունի և հետևաբար պետք է լավ կազմվի: Տպավորիչ ռեզյումե կազմելու համար անհրաժեշտ է ջանք, հմտություն և որոշակի խելամիտ ուսումնասիրություն: Եկեք չափից ավելի չպարզեցնենք այս գործընթացը: Ռեզյումեն պետք է բնական լինի, և դա է հաջողության հասնելու գրավականը…

Տեքստը թարգմանված և խմբագրված է հետևյալ աղբյուրից http://www.howtodothings.com/careers/how-to-build-a-winning-cv-that-positions-your-personal-brand-powerfully:

Սովորաբար գործատուի վրա առաջին դրական տպավորությունը թողնելու լավագույն միջոցներից մեկն է գրագետ և արհեստավարժ ուղեկցող նամակ գրելը: Ուղեկցող նամակն այն առաջին փաստաթուղթն է, որ տեսնում է աշխատատուն:

Հետևյալ խորհուրդները կօգնեն Ձեզ գրագետ և ճիշտ նամակ կազմել:

Երբեք մի խուսափեք ուղեկցող նամակ ուղարկելուց
Աշխատանքի դիմելու համար մեկ կանոններից է` ռեզյումեի հետ միշտ ուղարկել ուղեկցող նամակ:

Եղեք համառոտ
Զբաղված գործատուները ժամանակ չունեն կարդալ երկար նամակներ: Անցեք բուն թեմային այնքան արագ, որքան հանարավոր է` դարձնելով դրանք ավելի կարճ և հեշտ ընթեռնելի: Խոսեք բուն աշխատանքի պահանջների մասին` ինչու եք ցանկանում անցնել այդ աշխատանքին, որքանով եք համապատասխանում տվյալ պաշտոնին:

Էլ-փոստի բնույթը պահանջում է հակիրճ հաղորդակցություն, մասնավորապես, որովհետև ավելի դժվար է կարդալ էկրանի, քան թղթի վրա: Այնուամենայնիվ, սա չի նշանակում, որ կարող եք ուղարկել մեկ տողանոց ուղեկցող նամակ: <<Խնդրում եմ կարդացեք իմ ռեզյումեն և շնորհակալ եմ Ձեր ժամանակի համար>>: Դուք Ձեր նամակի մեջ պետք է կարողանք ներկայանալ որպես պատշաճ և արհեստավարժ մասնագետ:

Կազմեք ուղեկցող նամակը պրոֆեսիոնալ, սակայն ընկերական ոճով
Մինչդեռ ռեզյումեները սովորաբար համարվում են պաշտոնական փաստաթղթեր, ուղեկցող նամակները Ձեզ հնարավորություն են տալիս բացահայտելու Ձեր անհատականությունը: Դուք ոչ միայն ուզում եք ցույց տալ, որ համապասխանում եք տվյալ պաշտոնի համար, այլ նաև ցանկանում եք կարդացողին դուր գալ: Հումորի համապասխան կիրառումը` համակցված ընկերական և պրոֆեսիոնալ երանգով, կարող է գործատուի մոտ համակրանք ներշնչել Ձեր նկատմամբ:

Եղեք հստակ
Հնարավորության դեպքում հասցեագրեք նամակը կոնկրետ անձին: Փորձեք զանգահարել գործատուին (սակայն ուշադիր եղեք. որոշ հայտարարություններում նշված է ոչ մի հեռախոսազանգ) և գործատուի անունը հարցրեք ընդունարանի աշխատակցից: Նամակում  ողջունելիս օգտագործեք <<Հարգելի պրն. Վարդանյան>>, այլ ոչ թե <<Հարգելի Վարդան>> դիմելաձևը:

Կենտրոնացեք գործատուի կարիքների վրա
Փորձեք պարզել, թե ինչ խնդիրներ ունեն գործատուները, ինչպիսի մասնագետներ են նրանք փնտրում և որոնք են կազմակերպության նպատակները, և հետո նամակի միջոցով ապացուցեք, որ Դուք հենց այն մասնագետն եք, որը նրանց անհրաժեշտ է:

Եղեք բնական
Ձեր ուղեկցող նամակը դարձրեք առանձնահատուկ`ստեղծագործական մոտեցում կիրառելով: Օրինակ` Դուք կարող եք համառոտ շարադրել Ձեր հաջողված նախագծի նկարագիրը կամ եկամտաբեր գործարքը: Դուք կարող եք ներառել Ձեր աշխատանքային գործունեության արդյունքների գնահատականները` Ձեր հաջողությունները ցույց տալու նպատակով:

Սրբագրում
Ուղեկցող նամակները պետք է քերականորեն անսխալ լինեն , ուստի դրանք ուշադիր ստուգեք` նախքան ուղարկելը: Եթե ստուգելիս դժվարանում եք, ապա դիմեք որևէ միկին, ով կարող է մանրակրկիտ սրբագրել այն: Եթե Դուք ձևափոխում եք ուղեկցող նամակը, որը օգտագործում եք շատ պաշտոնների դիմելու համար, ապա փոխեք գործատուի անունը, պաշտոնը, որի համար դիմում եք, ընկերության կամ կազմակերպության անունը: Ուշադիր եղեք չսխալվել հատկապես գործատուի անուն, ազգանունը գրելիս: Ուղեկցող նամակ գրելու էտիկետը կարող է Ձեզանից ժամանակ պահանջել, բայց հավատացնում ենք, որ վատնած այդ ժամանակը արժանավույն կհատուցվի: Դուք ավելի շատ հարցազրույցների հրավիրվելու ու մասնակցելու հնարավորություն կունենաք, և կավելանան նոր աշխատանք գտնելու Ձեր հնարավորությունները:

Տեքստը թարգմանված և խմբագրված է հետևյալ աղբյուրից http://ezinearticles.com/?expert=Linda_Matias:

Պատահո՞ւմ է Ձեզ հետ արդյոք այնպես, որ ժամեր շարունակ չեք կարողանում արտահայտել Ձեր մտքերը և ճիշտ ու գրագետ ուղեկցող նամակ ձևակերպել: Երբեմն անգամ ռեզյումեն որոշում եք ուղարկել առանց այդ նամակի: Սակայն այլևս անհանգստանալու կարիք չկա: Ստորև բերված են ուղեկցող նամակ գրելու խորհուրդներ:

Ողեկցեղ նամակը սկսելու նմուշներ
- Ես վստահելի, որակի և մանրուքների վրա ուշադրություն դարձնող մասնագետ եմ, աշխատանքի մեջ հետևողական եմ: Քանի որ ներկայումս աշխատանք եմ փնտրում, կցանկանայի Ձեր ուշադրությանն ներկայացնել իմ ռեզյումեն:
- Ես գրում եմ, որպեսզի ներկայացնեմ իմ հետաքրքրվածությունը Ձեր ներկայիս թափուր աշխատատեղի վերաբերյալ, ուստի թույլ տվեք Ձեզ ներկայացնել իմ ռեզյումեն: Անցած տասը տարիների ընթացքում աշխատելով վաճառք իրականացնող բաժնում և շարունակաբար հաջողությունների հասնելով` ես վստահ եմ, որ կարող եմ արժեքավոր օժանդակություն ցուցաբերել Ձեր կազմակերպության ապագա նախագծերի և նախաձեռնությունների գործընթացում:
- Ես բարեխիղճ, կազմակերպված անձնավորություն եմ` ավելի քան 15 տարվա աշխատանքային փորձով:  Միշտ հետևողական եմ գործատուի պահանջների և նպատակների իրականացման մեջ, և քանի որ նոր աշխատանքային հնարավորություններ եմ փնտրում, կցանկանայի Ձեր ուշադրությանը և քննարկմանը ներկայացնել իմ ռեղյումեն:

Ուղեկցող նամակի վերջաբան գրելու նմուշներ
- Ես կապ կհաստատեմ Ձեզ հետ մեկ շաբաթվա ընթացքում, որպեսզի պարզեմ, թե Դուք ինչ եզրակացության եք հանգել: Միևնույն ժամանակ Դուք էլ կապ հաստատեք ինձ հետ, եթե Ձեզ մոտ որոշակի հարցեր առաջանան կամ, եթե լրացուցիչ փաստաթղթերի կարիք կունենաք: Շնորհակալ եմ Ձեր հատկացրած ժամանակի համար"
- Ես ներկայացնում եմ Ձեզ հմտությունների և ձեռքբերումների լրացուցիչ մանրամասնություններով իմ ռեզյումեն: Ես հաճույքով կընդունեմ հարցազրույցին հրավիրվելու հնարավորությունը: Շնորհակալ եմ ինձ հատկացրած ժամանակի համար:
- Իմ ռեզյումեում Դուք կարող եք ծանոթանալ իմ կարիերայում ձեռք բերած հաջողություններին վերաբերող տեղեկությունների հետ: Ես անչափ ուրախ կլինեի, եթե ինձ հնարավորություն ընձեռնվեր հարցազրույցի հրավիրվել: Նախապես շնորհակալություն եմ հայտնում Ձեզ` ինձ հատկացրած ժամանակի և իմ որակավորումները քննարկելու համար:
- Նախապես շնորհակալություն իմ կրթությունն ու մասնագիտական փորձը քննարկելու համար: Հուսով եմ, որ Դուք իսկապես այն կարծիքին եք, որ դեմ առ դեմ հանդիպումն ավելի նպաստավոր և արդյունավետ կլինի: Եթե Ձեզ մոտ որևէ հարցեր առաջանան կամ, երբ Դուք պատրաստ լինեք հարցազրույց նշանակել, ապա պարզապես զանգահարեք ինձ:

Տեքստը թարգմանված և ծմբագրված է հետևյալ աղբյուրից http://ezinearticles.com/?expert=Linda_Matias:

Եղեք ճշտապահ
Խորհուրդ է տրվում նախապես գնալ հարցազրույցն անցկացնելու վայրը, որպեսզի հաշվարկեք, թե որքան ժամանակ է պահանջվելու այնտեղ հասնելու համար: Միշտ հիշեք, որ Դուք երբեք չեք ունենա առաջին տպավորությունը գործելու այլ հնարավորություն:

Աշխատեք ժամանակից շուտ գալ: Դուք միշտ կարող եք մոտակայքում սրճարան, խանութ կամ էլ այլ հարմար վայր գտնել սպասելու համար: Բայց, եթե այնուամենայնիվ զգաք, որ ուշանում եք, զանգահարեք և տեղյակ պահեք:

Նախապատրաստվեք
Նախքան հարցազրույցին գնալը` այցելեք գործատուի ինտերնետային կայքը և որոշակի տեղեկություն ստացեք ընկերության գործունեության մասին:

Մտածեք հավանական հարցերի և դրանց պատասխանների մասին
Հավանական հարցերը գրի առնելը և դրանց նախապես պատասխաններ պատրաստելը կօգնի Ձեզ հարցազրույցի ժամանակ վստահ լինել և տալ հստակ պատասխաններ: Աշխատանքի մասին խոսելիս օգտագործեք երրորդ դեմք: Պետք չէ խոսել այնպես, կարծես վստաք եք, որ աշխատանքը արդեն Ձերն է:

Հարցրեք առաջարկների և աշխատանքային պայմանների մասին: Կարող եք նույնիսկ հարցեր տալ մրցակիցների և տվյալ ընկերության առավելությունների մասին:

Որոնք են Ձեր թույլ կողմերը
Մի լարվեք, մտածեք նախքան խոսելը: <<Ոչ… լավ, երևի, ես, իրականում, մի քիչ կատարելությանը ձգտող մարդ եմ>>: Փորձեք գտնել այն ոլորտը, որում Ձեր հմտություններն ու փորձը ներկայումս բավարար չեն: Հարցազրույց վարողը կգնահատի Ձեր ազնվությունը, իսկ ներկայացված թերությունները հեշտ կլինի ուղղել:

Դուք երբեք չեք ունենա այլ հնարավորություն առաջին տպավորություն թողնելու համար
ԺՊՏԱՑԵՔ: Հագնվեք պատշաճ ոճով`պարզ և գործնական: Եթե Դուք պատրաստվում եք աշխատել ձմեռային հանգստավայրում, դա դեռ չի նշանակում, որ հարցաղրույցին գնալու համար պետք է հագնեք մուշտակ և մորթե գլխարկ

Եղեք ազնիվ
Իսկապես իմաստ չունի ստել Ձեր կրթության, աշխատանքային փորձի կամ էլ հմտությունների մասին: Եթե սուտը բացահայտվի, և եթե նույնիսկ Ձեզ հաջողվի այդ տհաճ իրադրությունից դուրս գալ, միևնույնն է վստահ եղեք, որ Դուք երկար ժամանակ չեք կարող աշխատել այդ ընկերությունում:

Լրացրեք Ձեր ռեզյումի բացերը
Պատրաստ եղեք պատասխանել Ձեր աշխատանքային փորձում եղած ընդմիջումների մասին հարցերին:

Խոսեք ձեռքբերումների մասին
Հարցազրույց վարողներին հետաքրքիր է իմանալ, թե ինչ եք Դուք զգում որոշակի հաջողություն ձեռք բերելու ժամանակ: Ոմանք կխնդրեն Ձեզ բերել այնպիսի դեպքերի օրինակներ, որոնցով Դուք հատկապես հպարտանում եք. ինչպես եք լուծել խնդիրներ, ինչպես եք դժվար իրավիճակներից դուրս եկել:

Շատ մի խոսեք
Հաղորդակցությունը երկկողմանի գործընթաց է` սովորեք լսել Ձեր զրուցակցին:

Վերցրեք Ձեզ հետ լրացուցիչ ռեզյումե և նկար
Հարցազրույց վարողը Ձեզնից նման քայլ չի ակնկալի, դրանով դուք նրա վրա դրական տպավորություն կթողնեք: Սա նաև կօգնի նրանց հիշել Ձեզ հարցազրույցից հետո:

Եղեք խանդավառ և ինքնավստահ
Մի քննադատեք նախկին գործատուներին` մասնավորապես ընկերության սահմաններում: Կենտրոնացեք դրական ձեռքբերումների և տեսակետների վրա:

Եվ վերջապես, մի վհատվեք
Խնդիրը կայանում է նրանում, որ Ձեզ ամեն աշխատանք չեն առաջարկի, եթե նույնիսկ, ըստ Ձեզ, Դուք կատարյալ թեկնածու եք դրա համար: Սովորաբար դա պատահում է, քանզի հարցազրույց վարողը կատարյալ կույր էր իր առջև կանգնած տաղանդին տեսնելու համար: Այնուամենայնիվ, եթե կար աննշան հավանականություն, որն այդպես չէր,  այն հարցազրույցների ժամանակ բացահայտած տեղեկությունը, որտեղ Ձեզ մերժել են, կարող է անգնահատելի լինել ապագա արդյունքները բարելավելու համար: Քաղաքավարի կերպով հարցրեք, արդյոք նրանք կարող են Ձեզ տալ որևէ տեղեկություն ապագայի համար` միգուցե որևէ տեղ Ձեզ համար աշխատանք կա:

Այսօր բոլոր խոշոր կազմակերպությունների կադրերի գծով ղեկավարները` որպես թափուր աշխատատեղ լրացնելու առաջին փուլի միջոց, ընտրում են հեռախոսային հարցազրույց տարբերակը: Այն հնարավորություն է ընձեռում գտնել ամենահամապատասխան աշխատակցին` առանց շատ գումար կամ ժամանակ ծախսելու: Միևնույն ժամանակ հեռախոսային հարցազրույցները հնարավորություն են տալիս դիմողներին առանձնանալ իրենց մրցակիցներից և տպավորություն գործել գործատուի վրա: Անկախ նրանից, թե հարցազրույցի ժամանակ լսափողի որ կողմում եք գտնվում (ում դերն եք ստանձնում` գործատուի, թե աշխատանք փնտրողի), Ձեզ ենք ներկայացնում մի քանի օգտակար խորհուրդներ, որոնք կօգնեն Ձեզ հարցազրույցի ընթացքում:

Հեռախոսային հարցազրույցները Ձեզ մեծ հնարավորություն են ընձեռում ներկայացնել Ձեր հմտություններն ու փորձը տվյալ կազմակերպությանը:

1. Նախապատրաստվեք հեռախոսային հարցազրույցին` կազմակերպության մասին նախնական որոշակի տեղեկություններ հավաքելով:
2. Թույլ մի տվեք հարցազրույց վարողին Ձեզ անակնկալի բերել: Նախապատրաստվեք հարցերին` Ձեր ընկերոջ հետ կամ Ձեզ համար բարձրաձայն պատասխանելով հարցազրույցի ընթացքում սովորաբար տրվող հարցերին:
3. Ձեզ մոտ պատրաստ որոշ հարցեր ունեցեք, որոնք կցանկանայիք հղել, որպեսզի Դուք հարցազրույցի ընթացքում կազմակերպված և հետաքրքրված անձի տպավորություն թողնեք:
4. Փորձեք հեռախոսազանգի ժամն այնպես նշանակել, որ տանը մենակ լինեք և Ձեզ ոչ ոք չընդհատի:
5.  Եթե Դուք հեռախոսազանգը կատարում եք Ձեր ներկայիս աշխատավայրից, ապա հարցազրույց վարողին տեղեկացրեք այդ հանգամանքի մասին:
6. Զրուցելիս քայլեք: Դա կօգնի Ձեզ հնարավորինս ավելի համարձակ և աշխույժ լինել:
7. Հեռախոսազանգի ընթացքում խուսափեք ուտելուց, խմելուց(բացի ջրից) կամ մաստակ ծամելուց, քանի որ այդպես Դուք կարող եք ոչ պրոֆեսիոնալ մարդու տպավորություն թողնել:
8.  Ձեզ մոտ մեկ բաժակ ջուր ունեցեք, քանի որ ընթացքում Ձեր կոկորդը կարող է չորանալ:
9. Պատասխանեք հակիրճ:
10. Արտահայտեք Ձեր անկեղծ հետաքրքրվածությունը տվյալ պաշտոնի նկատմամբ:
11. Մի վախեցեք ընդունել այն փաստը, որ Դուք չեք կարող պատասխանել որևէ հարցի: Դա ավելի լավ է, քան պատասխան հորինելը: Սակայն Դուք միշտ կարող եք առաջարկել գտնել պատասխանը:
12. Հարցրեք հարցազրույց վարողին, թե որն է լինելու հաջորդ քայլը և հարցազրույցի ընթացքում պարզեք Ձեր առաջընթացի հեռանկարները:
13. Եթե ամեն ինչ լավ է ընթանում, ապա Դուք պետք է պարզեք, թե ինչպես կարող եք անձամբ հանդիպել գործատուին: Այդ դեպքում Դուք մեկ այլ հնարավորություն կունենաք տվյալ կազմակերպությանը համոզելու , թե ինչ հիանալի թեկնածու եք տվյալ պաշտոնի համար:

Տեքստը թարգմանված և խմբագրված է հետևյալ աղբյուրից http://www.howtodothings.com/careers/a2391-how-to-conduct-a-phone-interview.html:

Հարցազրույցն անցնելու ժամանակ շատ կարևոր է լավ տպավորություն գործել և ցույց տալ գործատուին, որ դուք առավելագույնս համապատասխանում եք տվյալ աշխատանքին: Միաժամանակ հնարավորինս շատ տեղեկություն հավաքեք տվյալ ընկերության մասին: Իրավիճակը պետք է լինի անպարտելի: Ահա մի քանի հուշումներ, որոնք պետք է ի նկատի ունենալ հարցազրույցի ժամանակ որոշ հարցերին պատասխանելու համար:

1. Տնային աշխատանքը կատարեք նախօրոք: Ընկերության ինտերնետային կայքը կամ այլ տեղեկատվական աղբյուրներ կօգնեն Ձեզ տեղեկություններ ստանալ տվյալ կազմակերպության մասին, ինչը կօգնի Ձեզ վստահ պատասխանել յուրաքանչյուր հարցի և բանիմաց ու քաջատեղյակ մասնագետի տպավորություն գործել գործատուի վրա:
2. Եղեք հանգիստ և անվրդով: Եթե զբոսանքը կամ ընթերցանությունը օգնում են ձեզ լիցքաթափվել, ապա զբաղվեք դրանցով մինչ հարցազրույցի  ներկայանալը:
3. Հիշեք, որ հարցազրույց վարողը նույնպես մարդ է: Հանդիպման ժամանակ նա նույնպես կարող է հուզված լինել: Այս միտքը կօգնի Ձեզ իրավիճակը պահել հսկողության տակ:
4. Եղեք ազնիվ Երբեմն ազնվորեն Ձեր հուզվածության մասին բարձրաձայն ասելը կարող է հեշտությամբ հանել լարվածությունը:
5. Եղեք ազդեցիկ: Պետք չէ լինել կաշկանդված և խիստ պաշտոնական: Ցույն տվեք, որ Դուք շփվող անձնավորություն եք, սիրում եք տեղին կատակել` միաժամանակ երևան հանելով Ձեր արհեստավարժությունը:
6. Մի մոռացեք,որ հարցազրույցի եք մասնակցում : Եթե անգամ Ձեզ հաճելի է հարցազրույցը վարողի հետ շփվել, մտերիմիկ դառնալու և անձնական տեղեկություններ պատմելու և տրամադրելու կարիք չկա:
7. Կենտրոնացեք Ձեր նպատակի վրա: Հարցազրույցի ընթացքում օրինակներ բերեք տարբեր աշխատանքային իրավիճակներում որոշումներ կայացնելու վերաբերյալ: Ցույց տվեք, որ Դուք կարող եք մեծ արժեք ներկայացնել ընկերության համար:
8. Եղեք ճկուն: Երբեմն հարցազրույցը չի ընթանում այնպես, ինչպես որ պլանավորված էր: Եթե հարցազրույց վարողը ստիպում է Ձեզ երկար սպասել, կամ տալիս է անսպասելի հարցեր, ապա գործեք ըստ իրավիճակի և ցույց տվեք, թե որքան հեշտությամբ եք Դուք կողմնորոշվում տարբեր իրավիճակներում:
9. Խուսափեք կարճ “այո” կամ “ոչ” պատասխաններից:  Երբ գործատուն Ձեզ հարց է տալիս, փորձեք տալ սպառիչ պատասխան` միաժամանակ բերելով տարբեր օրինակներ, որպեսզի մանրամասներով լրացնեք Ձեր պատասխանը:
10. Մի եղեք սահմանափակ: Եղեք ազնիվ: Մի ասեք միայն այն, ինչ Ձեր կարծիքով ցանկանում է լսել գործատուն:
11. Բացասականը վերածեք դրականի: Շատ հարցազրույց վարողներ խնդրում են, որպեսզի մարդիկ նկարագրեն իրենց թույլ կողմերը: Եթե այդպես է, եղեք պատրաստ ներկայացնելու Ձեր այն թույլ կողմը, որը իրականում կարող է շահավետ լինել Ձեր դիմած աշխատանքի համար: Օրինակ, եթե աշխատանքի պահանջներից մեկը  պոտենցիալ հաճախորդներին զանգահարելն է, ապա դուք կարող եք ասել, որ Ձեր թույլ կողմերից մեկն է երբեք չհանձնվել, նույնիսկ եթե իրավիճակն անհույս է: Սա կարող է բնավորության լավ գիծ լինել այն աշխատանքի  մեջ, որը վճռականություն է պահանջում:
12. Հարցեր տվեք: Կազմակերպության գործունեության, արտադրանքի/ծառայության, նպատակների, ինչպես նաև Ձեր դիմած աշխատատեղի վերաբերյալ հարցեր տվեք աշխատատուին: Դա ցույց կտա Ձեր հետաքրքրվածությունը տվյալ աշխատանքով և Ձեր արհեստավարժությունը:
13. Հաստատեք անմիջական կապ: Նայելով մարդու աչքերի մեջ և ժպտալով նրան հարմար պահին` Դուք կթողնեք վստահ, գրավիչ և անբռնազբոսիկ մարդու տպավորություն:

Տեքստը թարգմանված և խմբագրված է հետևյալ աղբյուրից http://www.howtodothings.com/careers/a2386-how-to-answer-job-interview-questions.html:

Աշխատանք փնտրելը նույնպես աշխատանք է: Երբեմն ինտերնետային ցանցին միանալը, անհրաժեշտ հայտարարություն գտնելը կամ դիմում-հայտեր լրացնելը կարող են ավելի շատ ջանք պահանջել, քան կարծում եք: Բայց մի հուսահատվեք: Դուք երբեք չգիտեք, թե երբ որևէ հայտնի ընկերության կադրերի բաժնի աշխատակից կզանգահարի Ձեզ դեմ առ դեմ հայցազրույցի հրավիրելու նպատակով:

Երբ Ձեզ զանգահարեն, Դուք միգուցե ուրախանաք այն մտքից, որ ընդամենը մեկ քայլ եք հեռու Ձեր երազած աշխատանքից: Այսպիսով փայլեցրեք Ձեր կոշիկները և սկսեք մտածել, թե ինչպես կարող եք լավագույն կերպով պատասխանել հարցազրույց վարողի հարցերին: Ահա մի քանի խորհուրդներ:

1. Եղեք ազնիվ: Դուք եք հարցազրույց վարողի վրա թողնում Ձեր մասին առաջին տպավորությունը: Համոզված եղեք, որ Ձեզ ներկայացնում եք որպես վստահությանն արժանի անձնավորություն:
2. Ցույց տվեք դրական վերաբերմունք: Բոլորն էլ նախընտրում են աշխատել լավատես մարդկանց հետ: Անկախ նրանից, թե ինչ հարցեր են Ձեզ տալիս, աշխատեք լինել լավատես և եռանդուն:
3. Ցույց տվեք Ձեր հմտություններն ու կարողությունները ամեն մի առիթի դեպքում: Եթե Դուք նախկինում աշխատել եք այդ նույն մասնագիտությամբ, ապա նշեք Ձեր  հաջողությունների և նվաճումների մասին:
4. Եթե Դուք ստացել եք համապատասխան կրթություն, անպայման նշեք դա: Ինչպես նաև, եթե Դուք հաճախել եք սեմինարների կամ աշխատանքի հետ առնչվող այլ դասընթացների, նշեք, թե ինչ եք ձեռք բերել այդ փորձառություններից:
5. Հարմար առիթի դեպքում գովաբանեք մյուսներին: Նշեք, որ Ձեր նախորդ գործատուն խրախուսում ու ոգեշնչում էր բոլորին և  կարողանում էր աշխատանքային միջավայրը դարձնել հարմարավետ ու արդյունավետ: Այլ մարդկանց մասին դրական արտահայտվելը նույնպես լավ է ներկայացնում  Ձեզ:
6. Երբեք ցույց մի տվեք այլ մարդկանց թերությունները, հատկապես նախկին ղեկավարներինը կամ գործընկերներինը: Հարցազրույց վարողը անմիջապես կկարծի, որ Դուք նույնը կարող եք անել նաև իր ընկերությունում:
7. Եթե Դուք քիչ աշխատանքային փորձ ունեք, նշեք այլ իրադարձություններ Ձեր կյանքում, որոնք տվել են Ձեզ գործնական փորձ, որը, կարծում եք,  կհամապատասխանի այդ պաշտոնին: Օրինակ կամավոր հիմունքներով աշխատանքն անցյալում կարող է Ձեզ սովորեցնել, թե ինչպես շփվել մարդկանց հետ և արդյունավետ օգտագործել ժամանակը:
8. Եղեք սրտաբաց և ընկերական, բայց ոչ շատախոս:
9. Դուք էլ հարցեր տվեք: Թույլ տվեք հարցազրույցը վարողին իմանալ, որ Ձեզ հետաքրքրում է ընկերության առաջընթացը և Ձեր հնարավոր ներդրումն ու նպաստումը դրան: Այնպես  արեք, որ նա իմանա, որ Դուք նախքան գալը որոշ տեղեկություններ եք ձեռք բերել ընկերության վերաբերյալ (Դուք դա արել եք, այդպես չէ) և, որ հույս ունեք կարևոր դեր ունենալ վերջինիս հետագա զարգացման գործընթացում:
10. Հնարավորինս խուսափեք որոշ թեմաներից: Փորձեք հարցազրույցը վարողի ուշադրությունը գրավել այն փաստի վրա, թե առանց սահմանափակումների Դուք ինչ կարող եք անել ընկերության համար: Եթե Ձեր երեխաներին խնամելու պատրվակով անհրաժեշտություն կլինի տուն գնալ աշխատանքից ամեն օր ուղիղ ժամը 17:00-ին, ապա իմացեք, որ սա այն պահը չէ այդ թեման շոշափելու համար:

Տեքստը թարգմանված և խմբագրված է հետևյալ աղբյուրից http://www.howtodothings.com/careers/a2159-how-to-answer-human-resource-or-hr-interview-questions.html:

Դուք միշտ պետք է ուղարկեք Ձեր հարցազրույցին հաջորդող «շնորհակալական նամակ» կամ հաղորդագրություն, քանի որ այն աշխատանքի ընդունման գործընթացի անբաժան մասն է կազմում և քանի որ չպետք է թերագնահատել «շնորհակալություն» ասելու կարողությունը: «Շնորհակալական նամակ»-ը ցույց է տալիս, որ Դուք ուշադիր և պրոֆեսիոնալ եք և հետևաբար կամրապնդի այն դրական տպավորությունը, որ թողել եք կարդացողի մտքում: Այս հոդվածը կօգնի Ձեզ գրել «շնորհակալական նամակ» պոտենցիալ գործատուին, բայց Դուք կարող եք նաև հարմարեցնել այս ձևաչափը այլ «շնորհակալական նամակներ» գրելիս:

Ահա պաշտոնական «շնորհակալական նամակի» հիմնական նմուշը.

• Հետադարձ հասցե. գրեք Ձեր հասցեն վերևի աջ անկյունում, այնուհետև գրեք ամսաթիվը:

  Օրինակ՝

  1234 Ռայթ փողոց Ցանկացած տեղ, Փենսիլվանիայում 15678 Հունիսի 30, 2005

• Հասցե. գրեք այս ինֆորմացիան ձախ եզրին մոտիկ: Ընթերցողի անունը նշվում է երկրորդ տողում: Չկրճատեք «ուղղված է» բառը:

  Օրինակ՝

  ABC ընկերություն Ուղղված է՝ Ջոն Դո 777 փողոց Ցանկացած տեղ, Նյու Յորքում 12345

• Ողջույնի խոսք. միշտ ուղղեք Ձեր «շնորհակալական նամակը» հատուկ անձի: Պայմանականորեն օգտագործեք «Հարգելի պարոն կամ տիկին», այնուհետև գրեք անուն կամ անուն, ազգանուն:

  Օրինակ՝

  Հարգելի պրն. Ռիչրդ Բրաուն

  Երբեք մի ուղարկեք «շնորհակալական նամակ»՝ օգտագործելով անձի աշխատանքային պաշտոնը, ինչպես օրինակ «Հարգելի շուկայավարման ղեկավար»: Ուղարկեք նամակը կոնկրետ անձնավորության և համոզվեք, որ նրա անունը ճիշտ եք գրել:

• Ստեղծագործական մաս: Այս մասը բաղկացած է 2 միջին երկարության պարբերություններից: Առաջին պարբերությունում շնորհակալություն հայտնեք ընթերցողին Ձեզ հետ հանդիպելու համար և փոխանցեք տվյալ ընկերության հետ աշխատելու Ձեր ոգևորությունը: Կարող եք նշել հարցազրույցի ամսաթիվը և պաշտոնը, որի համար դիմել եք: Պարբերությունների միջև մեկ տող բաց թողեք և երկրորդ պարբերությունում հակիրճ անդրադարձեք Ձեր որակավորումներին և հատուկ հմտություններին և թե ինչպես կարող եք օգտակար լինել ընկերությանը: Կարող եք ավելացնել նաև Ձեր հարցազրույցից վերցված ինչ-որ հետաքրքիր թեմա կամ գրավիչ պահ:
• Վերջին պարբերությունը: Վերստին շնորհակալություն հայտնեք ընթերցողին տվյալ պաշտոնի համար Ձեզ հաշվառելու համար: Եվս մեկ անգամ ընդգծեք Ձեր վստահությունը, որ կարող եք օգտակար լինել ընկերությանը: Ասեք Ձեր ընթերցողին, որ անհամբեր սպասում եք նրանից լուր ստանալ և դրեք որոշակի ամսաթիվ, թե երբ եք ակնկալում ստանալ հեռախոսազանգ:
• Եզրափակում: Մեկ տող բաց թողեք վերջին պարբերությունից և գրեք վերջաբան: Այս բառերից կամ արտահայտություններից յուրաքանչյուրը կարող է օգտագործվել եզրափակելու համար՝ անկեղծորեն, հարգանքներով, ջերմորեն: Եզրափակող արտահայտությունից հետո տող բաց տողեք և հաջորդ տողում գրեք Ձեր անունը: Եզրափակող բառի և Ձեր անվան միջև ընկած ազատ հատվածում ստորագրեք:

  Օրինակ՝

  անկեղծորեն ստորագրություն Ջեյմս Բրաուն

• Համոզվեք, որ Ձեր հեռախոսահամարը և ցանկացած այլ կոնտակտային տվյալ, ինչպես օրինակ Ձեր էլեկտրոնային հասցեն, պարզ նշված են նամակում:

Մի քանի օգտակար խորհուրդներ

• Ժամանակին: Ուղարկեք Ձեր «շնորհակալական նամակը» հարցազրույցից հետո 2 օրվա ընթացքում:
• Ձեռագիր: Ձեռագիր «շնորհակալական նամակները» իհարկե լավագույնն են, բայց կախված Ձեր անհատականությունից և ձեռագրից, տպագրված նամակը կարող է ավելի հարմար լինել:
• Արտաքին տեսք: Որքան էլ Ձեր նամակը անհատական տոնով լինի, այն պետք է ունենա պաշտոնական ոճ: Օգտագործեք ստանդարտ պաշտոնական ձևաչափ: Ընթերցողի անունից հետո դրեք ստորակետ և պարբերությունների միջև մեկ տող բաց թողեք:
• Անհատական մոտեցում: Եթե մի քանի հոգի են Ձեզ հետ հարցազրույց անցկացրել, ուրեմն շնորհակալություն հայտնեք յուրաքանչյուրին առանձին-առանձին: Խորհուրդ չի տրվում մեկ «շնորհակալական նամակ»-ը ուղղել բոլորին:
• Սրբագրեք: Ուշադիր խմբագեք Ձեր «շնորհակալական նամակը»: Խնդրեք մեկին, ում վստահում եք, դիտողություններ անել: Ուշադիր ստուգեք ուղղագրական սխալներ, կրկնվող կամ սխալ օգտագործված բառեր և արտահայտություններ:

Տեքստը թարգմանված և խմբագրված է հետևյալ աղբյուրից http://www.writeexpress.com/perfect-thank-you-letter.html

Ցանկացած հարաբերություն հաստատելիս կարևոր է թողնել դրական տպավորություն: Եթե ցանկանում եք հաջողության հասնել աշխատանքի վայրում, ապա պետք է տպավորություն գործեք Ձեր տնօրենի վրա: Երկարատև դրական տպավորություն ստեղծելու համար այլընտրանք չկա: Տքնաջան աշխատանք, հարգանք և անկեղծություն. ահա սրանք են հաջողության հիմնական գրավականները: Դուք անպայման տպավորություն կթողնեք Ձեր տնօրենի վրա, եթե.

1. Աշխատանքը կատարեք ժամանակին: Այն աշխատողը, ով բարձրորակ ապրանք է տալիս կամ ծառայություն է մատուցում ըստ ժամանակացույցի, միշտ վայելում է տնօրենի համակրանքը:
2. Հարգեք Ձեր տնօրենի ժամանակը: Լավ ղեկավարը իր աշխատողներին տրամադրում է այն ամենը, ինչ անհրաժեշտ է աշխատանքը կատարելու համար: Սա խնայում է Ձեր ժամանակը և խթանում բիզնեսը: Ձեր տնօրենը կշոյվի, եթե Դուք ևս գնահատեք նրա ժամանակը: Դուք կարող եք դա անել հարցնելով “այժմ հարմա՞ր է” ` նախքան որևէ քննարկում սկսելը, էլեկտրոնային փոստի կամ գրության միջոցով լուծելով այն խնդիրները, որոնք տվյալ պահին հրատապ չեն կամ ենթակա են հետագա քննարկման:
3. Խնդիրների հետ մեկտեղ առաջարկեք նաև լուծումներ: Եթե չնախատեսված խնդիր է ծագում, և Դուք պետք է խորհրդակցեք Ձեր տնօրենի հետ, ապա հանդիպումից առաջ խորհեք մեկ կամ ավելի լուծումների մասին: Խոսակցությունը սկսեք` ասելով, օրինակ, “Կարծում եմ, որ գտել եմ լուծումը, սակայն…” Համառոտ քննարկեք խնդիրը և առաջարկեք Ձեր ոչ թե վերջնական, այլ հնարավոր լուծման տարբերակները: Տնօրենը կգնահատի ինքնուրույն մտածելու Ձեր կարողությունը և իր կարծիքի հետ հաշվի նստելը:
4. Դրական վերաբերմունք ցուցաբերեք: Աշխատողները տնօրենից լավ վերաբերմունք են ակնկալում, նույնիսկ ճգնաժամային պահերին: Տնօրենները ակնկալում են նույնը: Ցանկացած բողոքի կամ բարեփոխման առաջարկության հետ մեկտեղ Ձեր տնօրենին մատնանշեք ութ դրական փաստեր:
5. Անկեղծ եղեք: Ոչ ոք չի սիրում մանիպուլյացիայի ենթարկվել, հատկապես տնօրենը: Անհարկի շողոքորթությունը, ժամանակի ընթացքում աշխատանքի կատարման կամ վարքագծի փոփոխությունը, տնօրենի ընտանիքի նկատմամբ կեղծ հետաքրքրությունը կամ հավելյալ աշխատանքը չեն կարող տպավորություն գործել: Դուք կգոհացնեք Ձեր տնօրենին, եթե ազնիվ և կայուն լինեք Ձեր աշխատանքում և հարցեր տաք միայն այն ժամանակ, երբ դրանք Ձեզ իրոք հետաքրքրում են և տեղին են:
6. Ժամանակ առ ժամանակ շնորհակալություն հայտնեք: Ցանկացած աշխատողի, ներառյալ ղեկավարին դուր է գալիս, երբ գնահատում են իր լավ կատարած աշխատանքը: Բազմաթիվ կազմակերպություններում գնահատման համակարգն ուղղված է դեպի առաջնակարգ աշխատողները: Մենեջերները հաճախ առաջարկում են դրամաշնորհներ պարգևել, սակայն իրենք հազվադեպ են դրանք ստանում: Եթե Ձեր կազմակերպությունում այդպես է, ապա պատեհ շնորհակալությունը կամ փոքր ժեստը անպայման լավ գնահատականի կարժանանա:

Տեքստը թարգմանված և խմբագրված է հետևյալ աղբյուրից http://laurentandbenon.blogspot.com/2009/07/how-to-impress-your-boss.html:

Քայլ առաջին- Գրանցվեք
JobFinder.am կայքում աշխատատեղերի վերաբերյալ հայտարարություններ տեղադրելու համար Դուք պետք է նախ գրանցվեք Գործատուներ բաժնում: Մեզ մոտ գրանցումը անվճար է: Յուրաքանչյուր հայտարարության համար պետք է որոշակի գումար վճարել: Ձեր անվճար գրանցումը իրականացնելու համար հետևեք ցուցումներին և լրացրեք գրանցման թերթիկը: Խնդրում ենք ի նկատի ունենալ, որ գրանցման ընթացքում լիարժեք տեղեկություն տրամադրելը շատ կարևոր է:

Քայլ երկրորդ- Կազմեք Ձեր աշխատանքային հայտարարությունը
Գրանցման վերջում Դուք պետք է մուտքագրվեք: JobFinder.am կայքում աշխատանքային հայտարարություն կազմելու համար ընտրեք “Տեղադրել հայտարարություն” հղումը: Լրացրեք հայտարարության դաշտերը և հետո սեղմեք “Տեղադրել” կոճակը:

Քայլ երրորդ - Աշխատանքային հայտարարության վերանայում JobFinder.am-ի կողմից
Մինչ Ձեր հայտարարությունը կայքում րնդգրկելը, այն պետք է վերանայվի JobFinder.am աշխատանքային թիմի կողմից: Այս փուլում Ձեզ կարող են առաջարկվել հայտարարության մեջ կատարել որոշ փոփոխություններ:

Քայլ չորրորդ- Ստացեք և վերանայեք աշխատանքային դիմում-հայտերը
Եթե JobFinder.am կայքում թափուր աշխատատեղի հայտարարություն տեղադրելիս Դուք նշել եք էլ.փոստի հասցե դիմում-հայտերը ստանալու համար, ապա կայքը հենց այդ էլ. փոստի հասցեով Ձեզ կուղարկի աշխատանքային դիմում-հայտերն ամեն անգամ, երբ որևէ թեկնածու դիմի այդ աշխատատեղի համար: Սակայն Դուք կարող եք ինքներդ կառավարել աշխատանքին դիմելու այդ գործընթացը` հայտարարության “Աշխատանքին դիմելու արարողակարգ” բաժնում նշելով աշխատանքային հեռախոսահամարն ու հասցեն, որտեղ անհրաժեշտ է ներկայացնել դիմում-հայտերը:

Այլ տեղեկություն:

• Փոփոխությունների դեպքում թարմացրեք Ձեր տվյալները “Իմ անձնագիրը” բաժնում:
• Տեղեկացեք Ձեր հայտարարությունների մասին “Իմ աշխատանքներ” էջում:
• Հայտարարությունը փոփոխության ենթարկելու համար սեղմեք “Իմ Աշխատանքները” էջի փոփոխություն կատարելու կոճակը: Եթե հայտարարությյունը բացված չէ, ապա այն կբացվի այնպես, որ Դուք կկարողանաք կատարել անհրաժեշտ փոփոխությունները: Եթե այն արդեն բաց է, Դուք պետք է կապ հաստատեք : JobFinder.am Աջակցության Թիմի հետ
• Մեկ անգամ գրանցվելով` Դուք կարող եք տեղադրել բազում հայտարարություններ:
• Որևէ դիտողությունների կամ առաջարկների դեպքում կարող եք կապ հաստատել JobFinder.am Աջակցության Թիմի հետ:

Հարգանքներով`
--
JobFinder.am Աջակցության Թիմ